Pirojektootni Bishaan Dhugaatii Magaalaa Saguree fi Boqojjii II Eebbifaman - Biiroo Bishaanii fi Inarjii Oromiyaa

Guyyaa har’aa Godina Arsii Aanaa D/Xiijoo fi Aanaa L/Bilbilootti kan argaman Pirojektootni Bishaan Dhugaatii Magaalaa Saguree fi Boqojji II bakka kabajamoo Obbo Fiqaaduu Tasammaa Hoogganaan waajjira Paartii Badhaadhina Naannoo Oromiyaa fi Hooggantoonni Biirolee gara garaa,Godina Arsii,Magaalaa Asallaa fi Aanaalee gara garaa akkasumas hawaasni bal’aan arfamanitti haala hoo’aan eebbifamee jira.

Sagantaa eebba Pirojektoota kanneen irratti argamuun haasaa kann taasisan Hooggantuun Biiroo Bishaanii fi Inarjii Oromiyaa Eng. Miliyoon Baqqalaa yoo ta’u, Pirojektiin Bishaan dhugaatii Boqojjii marsaa 2ffaa, pirojektii yeroo karoorfame keessatti xumuramee yoo ta’u, baajata mootummaa naannoo oromiyaa irraa ramadame qarshii miliyoona 110 oliin kan hojjatamaa turee fi ummata 20,500 tif tajaajila bishaan dhugaatii kan kennuu ta’uu ibsanii jiru.

Gama biraatin pirojektiin bishaan dhugaatii magaalaa Saguree baajata Baankii Addunyaa fi Mootummaa Naannoo Oromiyaa irraa ramadame qarshii miliyoona 140 oliin kan hojjatamee fi waliigalaa marsaa 1ffaa fi 2ffaan ummata magaalaa saguree fi naannoo ishee 65,000 oliif tajaajila bishaan dhugaatii kan kennu ta’uu itti addeessanii jiru.

Walumaagalatti hojiin ijaarsa bishaan dhugaatii hojii ogummaa,naamusaa fi obsa cimaa barbaadu waan ta’eef qaamota ijaarsa pirojektoota bishaan dhugaatii Boqojii marsaa 2ffaa milkeessuu keessatti gahee guddaa qaban keessaa Mootummaa Naannoo Oromiyaa, Dhaabbata OCC fi ECO fi kkf yoo ta’an, pirojektii Magaala saguree irratti immoo Dhaabbata Ijaarsaa Gaashaw Bantii fi waahila isaa Hagbes,Katama Consulting Engineering, Minister Bishaani fi Inarjii, Baankii Invastmantii Awuroopaa, Eejansii Misoomaa Faransaay, Misooma Qindaawaa Xaaliyaanii fi Walumaagalatti qooda fudhattoota hojii qorannoo fi design irraa eegalanii hanga bishaan ummata bira gahutti gahee isaanii bahaa turan hunda akkasums ogeeyyii Biiroo irraa hanga Aanaa jiranii fi caasaa mootummaa sadarkaan jiran galateeffachuun, hawaasni naannoo madda bishaanii jiraatanii fi sararri bishaanii oorruu isaa keessa qaxxaamuru miira abbummaatin pirojektoota kanneen tiikfatee tajaajila gahaa irra akka argachuu qabu dhaamanii jiru.